الفراشة السوداء
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

الفراشة السوداء

.-*-._Hello ! in Black_butterfly forum_.-*-.
 
الرئيسيةأحدث الصورالتسجيلدخول

 

 مذكرة لكم ..أول يوم بالجامعة

اذهب الى الأسفل 
2 مشترك
كاتب الموضوعرسالة
محمد توفيق صابر

محمد توفيق صابر


ذكر عدد الرسائل : 7
العمر : 35
الموقع : http://youthstorm.own0.com/index.htm
العمل/الترفيه : طلاب جامعي..عفوا ..طالب جامعي
المزاج : مزاجي جدا ..في دقيقة يتقلب
تاريخ التسجيل : 03/07/2008

مذكرة لكم ..أول يوم بالجامعة Empty
مُساهمةموضوع: مذكرة لكم ..أول يوم بالجامعة   مذكرة لكم ..أول يوم بالجامعة Icon_minitime123/7/2008, 9:45 am

السلام عليكم
أذكر لكم قصصا عشتها كذكريات ،أنقلها لكم كخبرات في هذه المساحة الضيقة التي تتسع بقلوبكم
وهذه الذكريات تبقى محفورة في ذهني لا تمحوها الأيام ..لأنها ذكريات عشت بها أحسن أيام حياتي
قصصي في الجامعة كثيرة ..مغامرات بلا حدود ..وهذه إحدى المغامرات الشيقة التي عشتها ..
سأكتبها باللهجة العامية للتسلية أكثر

خلينا ضرك من الفصحة و الهدرة بيها ..رانا قع جزايريين هنا و نفهموا بعضاتنا مليح ..مانطولش عليكم ..فيسع ..نحكيلكم الحكاية قبل ما تنعسو و ترقدوا ..راه السخانة تع الصيف والواحد ذبلان ..زيد يلقا موضوع يساعدو على النوم ..ما تفراش معاه ..
وحد النهار في الجامعة ..أول يوم من أيامات الجامعة ..دخلنا حصة عند الأستاذة مهى ..احنا نقولولها ميس مها ..زعمة كي ولينا نقراو اونقلي ..وكانت هاذيك أول درس ليا في الجامعة ..كنا في القسم مع بعضاتنا واحد ما يعرف الآخر ..خايفين و مش عارفين وش هي الجامعة ..وزيد ميس مها خلعتنا ..مع الدخلة عطاتنا رافال تع اونقلي ..ما قالتش mem pas راهم 1er Anne نساعدهم ..ولا صباح الخير و قالتها بالأونقلي ..تخلع فينا زعما ..
المهم ..قعدنا نسمعوا فيها وش تهدر ..حكمنا كلمات واللوخرين دعينا باش يكونوا مش مهمين ..ومن بعد قلنا ضرك نديروا حصة تعارف ..عادي ..كيما والفنا اللعوام لي فاتو ..بصح من لي ضربنا عليها نلقاوها جايبة رام تع ورق ..فيهم نص و أسئلة ..عقلية تع سوجي ..
يا خاه ..بدات الخلعة ..وبدا كل واحد يسقسي خوه لي مساميه ..أنا كان مساميا واحد من تيبازة ..كنت ما نعرفوش ..شاف فيا و قاللي ..ما تقوليش exam ..قلتلو العالم ربي ..لي نعرفها ما قرينا والو لحد الآن ..أول درس ..كيفاش تديرلنا أسئلة يا سيدي ..سمعتنا الميس ..هبطت النواظر و قالتلنا ..I hate to hear arabic words ..شافت فينا وحد الطفلة وقالتلنا ..ما تهدروش بالعربية ..
ومن بعد سقساتنا الطفلة ..هدرت بالأونجلي ..خزر فيها التيبازي ..قاللها مافهمتش وش قلتي ..راكي تهدري بالفرونسي ؟ ..ولا هكذا يهدروا ناس بليدة ؟ ..قصبتني الضحكة بصح كنيتها ..ما حبيتش نضحك ..عندي مواقف مع الضحك في القسم ..ماحبيتش يصراولي كينا هوما في أول يوم بالجامعة ..شديت الضحكة و شفت للأستاذة ..
فهمت من كلامها بللي تحوّس على كاش واحد يقرا النص ..طبعا كانت وزعت علينا النص ..كل واحد عندو نسخة ..شفت اليمين و اليسار ..واحد ما رفع يدو ..زدت هبطت راسي و استنيت كاش واحد يقرا ..
من دعاوي الشر ميس مها شافت فيا طول أنا و قالتلي كام هير ..كام هير ..يا بن عمي ..راها تعيطلي واقيل ..حطيت صبعي في صدري و قلتها أنا ؟ ..قاتلي ..yes you ..زدت تلفتت ..يا ويلي والله ق أنا ..وش هذا الزهر لي رقد فيه فكرون ..يا خاه نندب ..وش تحوس عندي ..

الفايدة نضت من بلاصتي حشمان ميّت بالحشمة ..ورحت ليها ..ومن الخلعة كي وصلت ليها قلتها ..السلام عليكم ..

سقساتني على الورقة تع النص ..قلتلها راهي في بلاصتي ..قالتلي روح جيبها ..خزرت فيها ..قلتلها في قلبي :كون قلتيلي من كنت في بلاصتي جيب ورقتك معاك ..وش خدام عند باباك أنا ضال رايح جاي ؟ ..
هبطت راسي و رجعت على سعدي ووعدي ..جبت الورقة ووقفت عندها ..قلت بالاك يهديها ربي و تحن عليا ..قالتلي ..ريد ذو تكست ..read the text ..يا خاه ..فهمتها هاذي الجملة ..كانت ميس تع الليسي تقولهالنا ..بصح كي شفت التكست قريب تقاشيت مساميها ..يابن عمي ذا موش تكست تع رحمة ربي ..
لعنت ابليس وقلت المرا قاعدة تستنى ..والطلبة راهم يستناو ..قلت بسم الله ..وبديت نقرا ..يا سيدي والله ق من أول كلمة بدات تصحح لي في الأخطاء ..كل ما نقول كلمة ترجعلي ..أحبس ..وتعاود تقراها ..وتقولي ما ننطقوهاش هاك ..مرة زوج ..تلاثة ..كثرتها ..ما خلاتنيش نقرا قع ..شفت فيها و قلتلها في قلبي ..علاه تعيطيلي نقرا ايمالا ..كنت قريتيه انتي برك ..يخي عقلية يخي ..خلينا نقراو يا سيدي ..
بصح ثان فقت لروحي و هبطت راسي و ما قلتلها والو ..قالتلي عاود أقرا من جديد ..نعلت النهار لي خيرت فيه هاذ القراية ..عاودت قريت ..ولسع ما كملتش سطر ..قالتلي أحبس احبس ..
حليت عينيا ..آه ..تهدر بالعربية ؟ ..والله ق هدرت بالعربية ..قريب سبيتها ..علاه من الصباح ما تهدريش بالعربية ؟ ..ومخليتني نتعذب مع هدرتك ..حسبتها ما تعرفش العربية ..ياويلي ..
المهم ...و أنا ندعي عليها في قلبي نسمع فيها تقول ..الطالب تع الأونجلي يليق كي يبدا يقرا نص ما يحبسش ..هاها..عمبالها الإنجليزية هاذي تطيح من السما ..ولا الباك تاعي ربحتو طمبولا ..جا من عند ربي ..نسات بللي قرينا و تعبنا باه لحقنا ثم ..شافت روحها قرات الإنجليزية سبع سنين على روحها تحوسني أنا 1يار آني ..نهدر كيما هي ..


خليتها تهدر تهدر ..طولت ...ما فهمتش روحها ..هنا تحبس..هنا تحبس ..والو ...
زيد أنا حشمت ..مقابل الطلبة قع و نسمع في التبهدايل ..ما فقتش لروحي حتى بديت نهدر معاها ..العجيب يا جماعة الخير ..هو أني كنت نهدر بالإنجليزية ..
الأستاذة تخلعت ..كيفاه تطرطق ليا هذا ؟ حسبتني طايح من رعدة ..ولا هابط من سطح القمر ..عمبالها ما نقدرش نركب جملة بالإنجليزية ..هاها..
المهم حطيتلها سعدها في يدها ..
مش عارف منين جاتني ..بصح كورجت و هدرت معاها ..كان صوتي باين عليه خايف ..بصح هدرت ..علابالي هردتها شوي في الهدرة ..بصح كلمات صحاح ..وكي نحصل في كلمة نهرب طول للمعنى ..وندير اشارت بيدي ..زعما راني عارف وما لقيتش الكلمة برك ..هاها..

خفت نجيبها برا ..نقصت لادوز ..خليتها هي تهدر ..

عجب ..ميس مها تبسمت ..ودنات ليا ..قربت مني ورفعت يدها ..حطتها على كتفي ..أنا درت حركة تع دفاع ..عمبالي راحا تضربني ..فاقولي صحابي ..شفت الجماعة ضحكو ..بصح استغربت ..وش جاب يدها على كتفي ..بصح يدها كانت حنينة بزاف ..وبدات تشكر ..أحم أحم ..
قالتلهم ..هكذا نحبكم يا طلبة ..كي تهدروا أونجلي ..
استعملوا الأونجلي في هدرتكم ..وبدات تنصح فيهم ..أنا فرحت وما سمعتش لنصايحها ..بديت نبيّـــن في روحي في الواجهة ..مع لي القسم معمر بنات ..راك تعرف ..الواحد فينا يزيد فيها شوي مع البنات يشوفو فيه ..هاها
راني شافي قلتها هكذا :
I'm sorry miss.but we are learners and we need time and advices from u to learn more and more ..we need your experiance as teacher ..and work as student ..
عادي الجملة عادية و مفهومة ..والحق تع ربي الكلمات تع ذراري صقار ..مصطلحات عادية
بصح الأستاذة عجبها الحال ..
سقساتني الأستاذة ..where are u from ? ..زعمة منين أنت ؟
جاوبتها : من بوسعادة ..بلاصة واسمها الهامل ..جاية في الجنوب ..بصح تميل للشرق أكثر ..
شفت جماعة كانو معايا من عين وسارة وين نسكن أنا ..ماعجبهمش الحال ..يحبو وسارة تبان ..زدتلها : بصح نسكن في عين وسارة ..
قريب حكيت للأستاذة قصة حياتي ..حبستني و بدات تحكي هي
..قالتلي روح اقعد في بلاصتك ..
قلتلها في قلبي ..زيدي شوي خلينا نريحو معاك شوي ..هاها..عجبني الحال ..
سيرتو كي عادت تشكر ..فتحتلي عينيا ..هاها

المهم ..ميس مها نسات النص لي قالتلنا أقراوه ..وبدات تحكيلنا على القرياة في الجامعة ..ياه يابن عمي ..راه عندها نصائح كيما أساتذه تع الليسي ..
ميس مهى هاذي هايلة ..قراتنا مليح ..بصح النقاط تمدهم بسيدي و سيدك ..والله ق تقول عليها شاريتهم وراها تصدق منهم ..هردتنا هاذاك العام ..بصح تعلمنا منها بزاف حوايج ..
كانت تعيطلي تاوفيق مش توفيق ..تاوفيق كلين ذو بورد ..تاوفيق ريد ذتكست ..تاوفيق وار ور يو ..حلاتلنا معاها هذاك العام بزاف ..
المهم ليجان روحو ترقدو ..المرة الجاية نزيدلكم حكاية أخرى ..
إن شاء الله
صح ..سلام
الرجوع الى أعلى الصفحة اذهب الى الأسفل
الفراشة السوداء

الفراشة السوداء


انثى عدد الرسائل : 17
العمر : 33
الهواية : مذكرة لكم ..أول يوم بالجامعة Readin10
أعلام الدول : مذكرة لكم ..أول يوم بالجامعة Female11
تاريخ التسجيل : 30/06/2008

مذكرة لكم ..أول يوم بالجامعة Empty
مُساهمةموضوع: رد: مذكرة لكم ..أول يوم بالجامعة   مذكرة لكم ..أول يوم بالجامعة Icon_minitime123/7/2008, 7:51 pm

و الله أول يوم راااااااائع و مرعب

ان شاء الله يعقب علينا سلامات كيما انت

ربي يوفقكـ

في أمان الله
الرجوع الى أعلى الصفحة اذهب الى الأسفل
 
مذكرة لكم ..أول يوم بالجامعة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الفراشة السوداء :: الركن العـــام :: المنتدى العام-
انتقل الى: